Comunicado...

 

Lamañazo Rock: agradecemento!

Dende a organización do Lamañazo Rock, e unha vez pasada case unha semana da celebración do festival na nosa carballeira, queremos facer este comunicado de agradecemento:

1. En primeiro lugar á xente do Castañazo, alma mater deste novo Lamañazo, por motivarnos a comezar con este proxecto, e guiarnos e acompañarnos no proceso.

2. Á directiva do IES Lama das Quendas por facer (burocracia, documentos oficiais e demais) e, sobre todo, deixarnos facer, confiándonos equipamento e instalacións do centro con total liberdade.

3. Á Aula de Debuxo de 4º ESO e o seu profesor José Miguel López Gómez, polo traballazo facendo o logo e o cartaz do festival en tempo récord.

4. Ao profesorado e comunidade educativa, pola axuda e ánimos recibidos, a pesares de ter que faltar a algunhas das súas clases nos intensos días previos ao festival.

5. A todas as bandas coas que contactamos que non puideron vir, por facernos chegar o seu alento e interese para futuras posíbeis edicións.

6. A todas as bandas que puideron arranxar (GRELIMNS, FÁBRICA DE ESPEJOS, PLADÜR e SEARAS) para podermos desfrutar, de xeito completamente desinteresado, da súa maxia ao vivo e cun equipamento mínimo e subterráneo.

7. A Sonia da cafetería do centro e do Nº13, quen nos aconsellou e axudou á hora de organizar a cantina, e traballou no picoteo das bandas participantes.

8. A todas as entidades, asociacións e empresas que, dun xeito ou doutro, axudaron e colaboraron para que este festival collera forma: Protección Civil (seguridade e sabios consellos), Casa da Música de Chantada (equipo de son), Remate Gráfico (camisetas), Calambuco Distribuciones (equipamento para a cantina e bebidas), FICH (amplificadores e sabios consellos) e Asociación Luis Nieves (apoio e difusión mutuos).

9. A Miguel Piñeiro do xornal El Progreso, e Chema Núñez da emisora de radio COPE Lugo, por estar pendentes dende o principio de facerse eco deste festival máis aló destas terras do Asma.

10. E por último, mais non menos importante, a todas as persoas que sacaron un anaco do seu valioso tempo para achegarse na tarde do 15 de xuño e formar parte do que, agardamos, sexa o primeiro de moitos festivais. Ilusión e ganas de traballar non han faltar, de seguro!

Viva O Lamañazo!

Lamañazo Rock: horarios!

 

Lamañazo Rock: entidades colaboradoras

 

Malas novas no Lamañazo: TÍAM GZ caen do cartaz...

Malas novas: por mor da troca de día do Lamañazo TÍAM GZ non poderán acompañarnos este xoves por motivos laborais.

Pedimos desculpas ao público que contaba coa súa presenza nesta primeira edición do festival.

Agradecemos de corazón á banda toda a súa disposición e interese dende o comezo, e todas as voltas que deron para tentar acudir na nova data. Mais non foi posíbel.

Agardamos poder argallar algo con eles nun futuro próximo.

No seu lugar fará o seu debut como DJ para o gran público a nosa Laura, cun listado de cancións que non deixará a ninguén indiferente...

En breve publicaremos os novos horarios... vémonos o xoves!

Aprazamento do Lamañazo!

 

Lamañazo Rock: cuarta banda confirmada!

Fábrica de Espejos é unha formación de synth pop altamente emocional con cadencia shoegaze.

 https://fabricadeespejos.bandcamp.com/

Lamañazo Rock: terceira banda confirmada!

Pladür é un dúo de lo-fi punk. Fan cancións sinxelas e pegadizas sobre as cousas que lle pasan á Lúa e o Santi.

https://pladur.bandcamp.com/

Lamañazo Rock: segunda banda confirmada!

A música tradicional virá da man das Searas nesta primeira edición do festival, formación cunha xa longa andaina polas festas e celebracións da bisbarra.

https://www.youtube.com/watch?v=1_WQ71-Hd7U

Lamañazo Rock: primeira banda confirmada!

TIAM Gz é un grupo de rap galego formado en Chantada no ano 2018 por Iago Suárez «Iagueiro», Álex Varela «Alessov», Brais Vázquez «Torozas» e Matías Zelarayán «Mr. Mati». Os integrantes do grupo definen a súa música como «rap feito na casa» a través do cal, ademais de transmitir as súas ideas persoais, inclúen temática político-social que se encadraría no galeguismo combativo. Afirman que o rap é o xénero musical que máis os representa porque outorga máis liberdade de expresión a quen canta e convida á reflexión e ao pensamento a quen escoita.

https://www.youtube.com/channel/UCvI_7ff2RaUjOK2mdH0X7Xg

Lamañazo Rock

 

Freestyle no Espazo Xove...

O pasado venres 28 de abril o alumnado de 4º da ESO estivo no Espazo Xove de Chantada facendo un taller de freestyle con membros de Gallos Del Norte no que, a través das emocións, traballaron técnicas de improvisación oral.

Grazas polo voso arte e o voso saber transmitindo! E, como non, ao Espazo Xove por facer actividades tan chulas para a rapazada da bisbarra!

Feliz Día Mundial da Poesía!

 

Lembrando de novo a Rosalía de Castro...

Os pasados días 23 e 24 de febreiro, no tempo de lecer, tivemos cadanseu recital con poemas de Rosalía de Castro, no que alumnado de ESO e Bacharelato, xunto con profesorado do Lama das Quendas, participou nesta actividade que se está a facer imprescindíbel no noso calendario anual.

Grazas a todas as persoas participantes!

A foto, de María de la Paz Carballo (mil grazas companheira!).

Andrea Franco no Lama das Quendas.

O pasado venres 3 de marzo tivemos unha fantástica actividade con Andrea Franco en colaboración con Os Casares sobre xeitos experimentais de abordar o mundo audiovisual, e todo elo cunha viaxe a través da historia do cinema. Mil grazas polo teu saber!

Día de Rosalía de Castro